కక్షి – సత్యమేల జయతే

పాత్రలన్నింటిపై విచారణ

(అజంతపురం, వ్యూస్‌లైవ్) ముఖ్యమంత్రిగా వైనో రాజీవశేఖరరెడ్డి అందిస్తున్న జనరంజక పాలనకి గండి కొట్టాలని ప్రతిపక్ష నేత ఏరా ఇంద్రబాబు రాయుడు, ఏనాడు పత్రికాధిపతి సూమోజీరావు విపరీతంగా, విచ్చలవిడిగా ప్రయత్నిస్తున్నారని, ఎద్దు శీను హత్య కూడా ఆ కుటిల ప్రయత్నాల్లో ఒకటని రాష్ట్ర మంత్రి రఘుశూరారెడ్డి ఆరోపించారు. గండి కొట్టటానికి అవసరమైన తట్టా, బుట్టా, పలుగు, పార, పొక్లైన్లు, బుల్‌డోజర్ల వంటి సాధనాలు వారు ఎప్పుడెప్పుడు ఎక్కడెక్కడ కొనుగోలు చేసిందీ రసీదులతో సహా తన వద్ద ఆధారాలున్నాయని ఆయన ప్రకటించారు. ఆ మధ్య జరిపిన రైతు యాత్రల సందర్భంగా ఇంద్రబాబు రైతు వేషంలో దిగిన ఫొటోల్లో గడ్డపార చేతబూని ఉండటాన్ని దీనికి సాక్ష్యంగా విలేకర్ల ఎదుట ప్రదర్శించారు. ఎద్దు శీను హత్యకు సంబంధించి ఒక్కొక్కటిగా బయటపడుతున్న విషయాలను అరబిందె ఫార్మా వారి ఆధునాతన ప్రయోగశాలల్లో విశ్లేషించగా దీని వెనుక ఉన్నవారి పేర్లు మొత్తం బయట పడ్డాయని ఆయన చెప్పారు.

ఫ్యాక్ష్యన్ పగతో రగిలిపోతున్న పగడాల వినీత; ఈ తరహా సినిమాల కధారచనలో లబ్దప్రతిష్టులైన పడుచూరి సిస్టర్స్; పాయలసీమ, రల్నాడు ఫ్యాక్షన్ కక్షల నేపధ్యంలో అనేక సినిమాలు తీసిన దర్శకులు జి.భోపాల్ మరియు యు.యు.యు.యు.యువనాయక్; అటువంటి చిత్రాల్లో విరివిగా నటించే ప్రముఖ కధానాయకుడు ‘యువవజ్ర’ మందనూరి గోలకృష్ణ, ఆయన అభిమాన ప్రేక్షకులు; వైనో ని అప్రదిష్టపాలు చేయటమే పనిగా పెట్టుకున్న పత్రికాధిపతి సూమోజీరావు; ఆయన పత్రికలో వ్యాసాలు రాసే జల్‌దీప్ డయ్యర్, కేజీ సూరాని, కార్టూనిస్టు శ్రీకర్; ఏనాడు దినపత్రిక చందాదారులు, పాఠకులు, ఏజెంట్లు; ఆ రెండో పత్రికాధిపతి వి.సుధాకృష్ణ మరియు అతని ఉద్యోగుల బృందం; అధికార కాంక్షతో అల్లాడుతున్న ఇంద్రబాబు; వచ్చే ఎన్నికల్లో బాబుతో జట్టు కట్టాలని ఆవురావురుమంటున్న మ్యూకనిస్టు పార్టీ నేత టి.వీర్రాఘవులు – వీరంతా ఎద్దు శీను హత్య వెనుక అసలు సూత్రధారులని ఆయన విశదీకరించారు. ఇన్ని లక్షలమంది కలిసి ఒకరి హత్యకి కుట్ర పన్నిన సందర్భం ప్రపంచ చరిత్రలోనే మరోటి లేదని ఆయన అన్నారు. హత్యలో వీరందరి పాత్రలపైనా విచారణ జరగాల్సిందే అని ఆయన స్పష్టం చేశారు. విచారణ నిమిత్తం వీరందరి పాత్రలను పోలీసులు త్వరలో స్వాధీనం చేసుకోనున్నారని తెలిపారు.

ఈ ఏడాది దసరా నాడు ఇంద్రబాబు, సూమోజీల సమావేశంలో జరిగిన ప్రధాన చర్చ ఎద్దు శీను హత్య గురించే అన్న సమాచారం తమవద్ద ఎప్పటినుండో ఉందని మంత్రి చెప్పారు. ఇదే కాదు, గతంలో ఇంద్రబాబు ముఖ్యమంత్రిగా ఉన్నప్పుడు బిల్ డోర్స్, బిల్ క్వింటన్ వంటి ప్రపంచ ప్రముఖులతో సమావేశాల్లో చర్చించినదీ ఇదే విషయమనేదానికి తనవద్ద రుజువులున్నాయని ఆయన వెల్లడించారు. ముందే తెలిసినా ఎందుకు మిన్నకున్నారన్న ప్రశ్నకి ఆయన సమాధానం దాటవేశారు. అప్పట్లో విశ్వ బ్యాంకు కూడా ఈ కుట్రకవసరమైన మొత్తాన్ని రుణంగా మంజూరు చేసిందని, ఆ ఒప్పంద పత్రాలు తమ పార్టీ ఎంపీ తొండబల్లి తరుణ్ కుమార్ సంపాదించగలిగారని ఆయన వెల్లడించారు. టుంగూరులో ఇటీవల జరిగిన మందనూరి వారసుల యువరంకె సభలో ఇంద్రబాబు ఆమెరక దేశాధ్యక్షురాలు ఓ.భామ ని ప్రశంసించిన నేపధ్యంలో, ఈ హత్య వెనుక విదేశీ హస్తం ఉందేమోనన్న అనుమానాన్ని ఆయన వ్యక్తం చేశారు. కుట్రదారుల జాబితాలో ఓ.భామని కూడా చేర్చే విషయం తమ పరిశీలనలో ఉందని ఆయన అన్నారు. అవసరమైతే ఇంటర్‌పోల్‌ని కూడా రంగంలోకి దించుతామని మంత్రి ఓ ప్రశ్నకి బదులుగా చెప్పారు. సిట్టింగ్ జడ్జ్‌తో విచారణ జరిపించమంటున్న ప్రతిపక్షాల డిమాండ్‌పై స్పందిస్తూ ‘మేం ఏ విచారణకైనా సిద్ధం. తప్పకుండా జడ్జిగారు కూర్చుని విచారణ జరిపే ఏర్పాట్లు చేస్తాం’ అని హామీ ఇచ్చారు.

కేవలం ఒక జనరంజక ప్రభుత్వాన్ని అప్రదిష్టపాలు చేయటానికి, దుష్ట తెలుగురాష్ట్రం పార్టీని మళ్లీ అధికారంలోకి తీసుకురావటానికీ బాబు-సూమోజీ శిబిరం ఆడుతున్న నాటకాల్ని ప్రజలు అర్ధం చేసుకోగలరని ఆయన అభిప్రాయపడ్డారు. సదా ప్రజా సంక్షేమమే తమ అభిమతం కాబట్టే తమ హయాంలో జైళ్లని సైతం జనరంజక నాటక ప్రదర్శనలకు అనుగుణంగా రూపుదిద్దామని, అయితే ఇంద్రబాబు పదవీ కాంక్షతో ఆ సదుపాయాన్ని దుర్వినియోగం చేస్తున్నారని ఆయన ఆరోపించారు. మద్దెలదరువు శౌరిని కూడా హత్య చేసి దాన్ని వైనో, ఆయన కుమారుడు గజన్‌ లకు అంటగడతారేమోనని తనకు భయంగా ఉందని ఆయన గజగజ వణుకుతూ చెప్పారు. ఎద్దు శీను హత్య దానికి రిహార్సల్ మాత్రమేనని, అసలు షోకి తెలుగురాష్ట్రం పార్టీ ప్రధాన కార్యాలయంలో ఏర్పాటు చేసిన ప్రత్యేక కౌంటర్ల ద్వారా టికెట్ల అమ్మకాలు జోరుగా సాగుతున్నట్లు తమకి సమాచారముందని ఆయన తెలియజేశారు. అయినప్పటికీ, ప్రత్యర్ధులని గౌరవించే సంప్రదాయం తమది కాబట్టి ఇంద్రబాబు తదుపరి షోకి ఎటువంటి ఆటంకాలు కల్పించబోమని ఆయన స్పష్టం చేశారు. తమకు అందరూ సమానులేనని, ఇంద్రబాబు అడిగితే ప్రదర్శన విజయవంతం చేయటానికి తమవంతు సహాయం చేయటానికి కూడా సిద్ధమేనని తెలియజేశారు. డ్రెస్ రిహార్సల్‌కి అవసరమైన కత్తులు, కటార్లు, డంబెల్స్ మరియు ఇతర సెట్టింగులు తామే సమకూర్చిన విషయం, జైలు అధికారులు కూడా సహకరించేలా చేసిన సంగతి ఈ సందర్భంగా గుర్తు చేశారు.

విలేకర్ల సమావేశాన్ని ముగిస్తూ, ఎద్దు శీను హత్య విషయంలో చట్టం తన పని తాను చేసుకు పోతుందని మంత్రి చెప్పారు. దానిపై అడిగిన మరో అనుబంధ ప్రశ్నకి బదులిస్తూ – తమ పాలనలో చట్టం పని చట్టం, దొంగల పని దొంగలు చేసుకు పోతారని, అవసరమైతే ఒకరికొకరు సహకరించుకుంటారే కానీ ఒకరి పనిలో ఒకరు తలదూర్చరని వివరించారు.